Скотт Фицжеральдын зохиол “Агуу Гэтсби”-г дахин нэг удаа дэлгэцийн бүтээл болгон амилуулсан 3D кино шуугиантайхан нээлтээ хийсэн ч кино театруудын орлогоороо “Төмөр хүн”-ийг давж чадсангүй. XX зууны шилдэг зохиолоос сэдэвлэн бүтээж, Леонардо ди Каприо гол дүрд нь тоглосон “Агуу Гэтсби” өнгөрөгч долоо хоногт 51 сая ам.долларын орлого олсон бол Диснейн “Төмөр хүн” 72,5 сая ам.доллараар “box office”-ийг тэргүүллээ. 

“Төмөр хүн -3” хоёр долоо хоногийн өмнө дэлхийн томоохон 4253  кино театрт нээлтээ хийхдээ эхний долоо хоногтоо 175 сая ам.долларын орлого олсон юм. Харин олон улсын кино театруудаас олсон хоёр долоо хоногийнх нь орлогыг нийтэд нь тооцвол 949 сая ам.долларт хүрч, тэрбум ам.долларын босгонд бараг тулж ирээд байгаа юм.
Тэгвэл Уорнер Бросын бүтээл “Гэтсби” 3535 кино театрт нээлтээ хийсэн бөгөөд хүлээж байсан шиг өндөр ашиг орлого дагуулаагүй ч, Холливудын хамгийн сайхан залуусын нэг Леонардо ди Каприо тоглож, киноны хөгжмийг нь Жэй Зи хийсэн гэдгээрээ олны сонирхлыг ихээхэн татсаар байна.