Хот шиг хот, улс улс болгох зорилго тавин ажлаа эхэлсэн Үүл баатар танд ташуур өгөх гэсэн юм. Учир юу гэвээс, таны ажил ярьж байсан шиг ээ урагшилж өгөхгүй байгаа нь нэг л итгэлгүй мэт санагдах болов. Улаанбаатар хотын албан ёсны вэб сайтад мэдээллэснээр энэ зун нийслэлийн хэмжээнд 30 гаруй замд шинэчлэл хийнэ гэсэн байсан. Гэтэл өнөөдөр бодит байдал дээр хоёрхон замд л засварын ажил хийж байгаа нь чамлалттай мэт санагдаад байгаа юм л даа. Зам барилгын ажлыг хавар болж ханш нээхтэй зэрэгцээд л эхлүүлдэг гэж ярилцдаг. Гэтэл өнөөдөр зуны эхэн сар гарчихаад байхад урагшилж байгаа зам, барилга нэг л нүдэнд үзэгдэхгүй байна.
Бүр тодорхой хэлбэл, миний амьдардаг “Дэнжийн 1000” чиглэлд дөрөвдүгээр сарын 15-наас эхлэн замын шинэчлэл хийнэ гэсэн байсан. Өнөөдөр тэр замд шинэчлэх нь битгий хэл нэг ч нүх нөхөөгүй л байна. Бид машин унаад байгаа юм уу, үхэр тэрэг унаад байгаа юм уу гэдгээ ч ойлгохоо байсан. Орчин цагийн унаа уг нь, явдлыг нь зөөлрүүлж, зорчигчдод таатай байлгах үүднээс амортизатортой болоод чамгүй удаж байгаа биз. Гэтэл амортизатортой машин маань довон дунд явж байгаа үхэр тэргээс ялгагдахааргүй л байдалтай, тийм л замаар туучиж явна. Муу ч гэсэн замтай байж гэж битгий шүүмжлээрэй. Дардан замгүй, шороогоор туучуулж байгаа газар олон байгаа гэдгийг ойлгож байна. Таныг энд зам тавина, энэ замыг шинэчилнэ, сайхан болгоно гэж хэлсэн болохоор л нэхэл хатуутай нэхээд байгаа юм. Тиймээс одоо эхлээгүй байгаа зам хэзээ ашиглалтад орох бол гэж санаа зовниод л байна. Зуны улиралд өдөр болгон нартай байдаг биш дээ. Хэд хоногоор бороо үргэлжлэн орно. Тэр болгонд замын ажил саатна. Тэгэхээр товлосон хугацаандаа ашиглалтад орж чадах уу. Чадахгүй бол нэг л өдөр өвөлтэй золгоно. Ингээд ирэхээр нөгөө бидний хүсэн хүлээсэн зам, таны амласан зам даший шог л болох гээд байна.
За яахав, түргэн шуурхай зам барьдаг компани байж болох. Хамгийн гол нь татвар төлөгчдийн мөнгийг зам ч биш, там ч биш болгох вий. Үүнд л санаа зовсондоо танаас ажлаа шуурхайлаач гэж хүсээд байгаа юм.
Дээрээс нь бас нэг санаа зовсон зүйл нь мөн л таны хийх гээд байгаа ажлын нэг. Гэр хорооллыг дахин төлөвлөж, орчин үеийн тохиолог хаустай болгох, орон сууцжуулах ажил.
Өнөөдөр дахин төлөвлөлт нэрийн дор айлуудын буурин дээр барилга сүндэрлүүлэх гээд байгаа аж ахуйн нэгжүүдийн чинь ааш аяг хэрээс хэтэрч байгаа юм бус уу. Нэг хашаанд байгаа гурван айлыг нүүхийг шаардаж, нүүхгүй бол газрын хөрстэй тэгшлэнэ гэж айлгаж байх хэрэг байна уу. Мэдээж төлөвлөлтөд орсон газраас нүүж л таарна. Гол нь тухайн айлын хашааг авсныхаа төлөө ямар хэмжээтэй байр өгөх юм бэ. Нэг хашаанд гурван айл байхад тэдний дунд 30 ам.метр талбайтай нэг өрөө байр өгнө гэхээр хэн хашаагаа өгөх юм бэ. Нэг өрөө байрандаа гурван өрх ороод тус тусынхаа голомтыг бадраах хэрэг үү. Ингэж ажин түжин амьдарснаас тус тусынхаа таван ханатад амар жимэр амьдарсан нь дээр бус уу. Энэ мэтээр таны хийх гээд байгаа ажил нэг л итгэл төрүүлэхгүй нь.
Уг нь, хотыг яндангаас нь салгаж чаддаггүй юм аа гэхэд, янданг нь цөөлөх нь чухал. Тиймээс та ажилдаа ханцуй шамлан орооч, Үүл дарга аа.
