Батаарыг эх нутагтаа буцаан авчрах ажилд гардан зүтгэсэн хүмүүсийн нэг бол Соёл спорт аялал жуулчлалын сайд Ц.Оюунгэрэл. Тираннозавр батаарыг АНУ-ын талаас хүлээн авах гэрээнд улсаа төлөөлөн гарын үсэг зурж, тэрхүү үзгээ ирээдүйд байгуулах музейдээ үзмэр болгон хадгална хэмээн баяртайгаар ярьж зогсох үед нь түүнтэй ярилцлаа.


-Батаараа буцааж авах энэ их ажлыг эхлүүлсэн хүний хувьд танд баяр хүргэе.
-Баярлалаа.

-Хулгайлагдсан соёлын өвийг буцаан авах гэрээнд гарын үсэг зурлаа. Ингэснээр Батаарыг албан ёсоор Монгол руугаа буцаах эрх нь нээлттэй болж байна гэсэн үг үү?
-Тийм ээ, олдвороо ачуулах эрх нээгдэж байна гэсэн үг. Хүлээн авах ёслолынхоо дараа батаараа баглаа боодлын компани руу явуулна. Баглаа боодол маш нарийн, чимхлүүр ажил байдаг юм байна. Тиймээс жаахан цаг авах байх.

-Олон улсын музейн өдөр энэ сарын 18-нд тохионо. Тэр үед Батаар эх нутагтаа очсон байх болов уу?
-Бид 18-наас өмнө амжуулах гэж маш их хичээж байгаа боловч техникийн хувьд боломжгүй гэсэн хариу сонсоод сууж байна.  Яагаад гэвэл зөвхөн баглаа боодолд гэхэд л техник ажиллагаа асар их ордог юм байна. Зөөлөвч хийж баглаж бооход лав хоёр долоо хоног зарцуулах юм байна. Тэгэхээр энэ сарын 18-нд Батаараа үзүүлж арай л амжихгүй нь. Харин Хүүхдийн баяраар бол ямар ч байсан хүүхдүүддээ барих бэлэгтэй байх нь ээ.

-Монголд аваачаад яг хаана байрлуулах вэ. Музейн байшингийн асуудал хараахан цэгцрээгүй байдаг...
-Музейн барилгын асуудал маргааш шүүхээр шийдэгдэнэ. Хэрвээ хариу нааштайгаар шийдэгдвэл Батаараа музейдээ байрлуулна. Үгүй бол түр музей ч гэсэн байгуулж л таарна даа.


-Батаарыг Korean Air компани үнэгүй тээвэрлэхээр болсон гэсэн баяртай мэдээг та сая дуулгалаа. Монголын талаас ямар байгууллагууд тээвэрлэх ажилд Засгийн газартай хамтарч ажиллаж байгаа вэ?
-Тийм ээ, Корейн эйр Тираннозавр батаарыг үнэ төлбөргүй тээвэрлэж өгөхөө мэдэгдсэн. Манай улсын зүгээс тээвэрлэлтийг Туушин компани хариуцаж байгаа. Соёлын өвийг тээвэрлэдэг туршлагатай учраас Туушинтай хамтарч байгаа юм. Даатгалыг нь Бодь интернэшнл хариуцаж байгаа.

-Батаараа хүлээн авсан энэ үйл явдал бол гадагш хулгайлагдсан соёлын өвөө цаашид буцааж авахад шан татсан үйл явдал боллоо. Хууль бусаар хил давсан бусад соёлын өв, олдвороо буцаах сайхан мэдээ байвал хуваалцахгүй юу?
-АНУ-ын Прокурорын газрын төлөөлөлгч Прит Бхарара Англиас ирүүлж байгаа 17 олдворын тухай ёслолын үеэр хэлснийг та бүхэн сонссон байх. Тэднийг мэдээж Монгол руу буцаана. Энэ хэргийн хүрээнд гэхэд л ийм олдворуудаа бид буцааж авахаар болж байна. Цаашид соёлын үнэт олдворууд улам олуулаа эх нутаг руугаа очих байх аа.