Монгол Улсын хэмжээнд үйл ажиллагаа явуулж байсан томоохон үйлдвэрүүд 1990 оны эхээр үүд хаалгаа барьснаар, дотоодын үйлдвэрлэлийн салбар зогсонги байдалд орсон. Тэгвэл энэ салбарын үйл ажиллагааг сэргээсэн нэгэн үйлдвэр хаалгаа нээж байна.
“Тэргэнцэр засвар үйлчилгээний төв” нэртэйгээр нээгдэж буй үйлдвэрийн нээлт өнөөдөр 11:00 цагт Тэргэнцэртэй иргэдийн үндэсний холбооны байранд буюу Хан-Уул дүүргийн хоёрдугаар хороо, Хөдөлмөр эрхлэлтийн үйлчилгээний төвийн баруун тал Гутлын үйлдвэрийн хашаанд болох юм. Нээлтийн ёслолд ХАХНХ-ын сайд С.Эрдэнэ, Сэргээн засалт, хөгжлийн үндэсний төвийн ерөнхий захирал Б.Нарантуяа, Монголын тэргэнцэртэй иргэдийн үндэсний холбооны тэргүүн Б.Чулуундолгор болон бусад төлөөлөгчид оролцох юм байна.
Монголдоо анх удаа нээгдэж буй энэхүү үйлчилгээний төв нээгдсэнээр гадаадын улс орноос өндөр өртгөөр худалдан авдаг байсан тэргэнцэр, тэргэнцрийн сэлбэг, засвар үйлчилгээг дотооддоо хямд зардлаар, богино хугацаанд авах боломж бүрдэх давуу тал бий болж байгаа юм байна.