Боловсролын үнэлгээний төвийн Хэвлэл мэдээлэл, сурталчилгаа, олон нийттэй харилцах мэргэжилтэн Ө.Төгөлдөрөөс Элсэлтийн ерөнхий шалгалтын бүртгэл дууссантай холбогдуулж дараах зүйлсийг тодрууллаа.

-2013 оны ЭЕШ-ын бүртгэл өнгөрсөн долоо хоногт дууссан. Энэ онд нийт хэдэн сурагч ЭЕШ өгөхөөр бүртгүүлсэн бэ?
-Улсын хэмжээнд бүртгүүлсэн шалгуулагчийн тоо 43864  байна.  Төгсөх ангийн 37449 сурагч бүртгүүлсэн. Үлдсэн 6415 нь гадаадад байгаа болон өнгөрсөн жилийн төгсөгч. Хуваарийн  дагуу өнөөдрөөс эхлэн хөдөө орон нутагт байгаа ЭЕШ хариуцсан мэргэжилтнүүдээс мэдээлэл хүлээж авна. Ерөнхийдөө мэдээллийн бүртгэл  бааз ирэх сарын 01 хүртэл хийгдэнэ. Тиймээс бүртгэлийн одоо гаргаад байгаа тоо ганц хоёроор өөрчлөгдөж магадгүй.
-Бүртгүүлэгчдэд суудлын хуваарь бүхий шар хуудсыг хэзээ тараах вэ?
-Зургадугаар сарын 1-ээс 7-нд суудлын хуваарь бүхий шар хуудас төгсөгчдөд тараана. Энэ жил сургуулиа төгсч байгаа шалгуулагчид сургуулиасаа авна.  Харин өмнөх оны төгсөгчид буюу дахин их, дээд сургуульд шалгалт өгөхөөр бүртгүүлсэн шалгуулагчид Боловсролын үнэлгээний төвөөс бичиг баримттайгаа ирж авах боломжтой. Орон нутгийн сурагчид тухайн газрынхаа Боловсролын газраас шар хуудсаа авна.
-Шалгалтын хугацааны талаар?
-Шалгалтыг улсын хэмжээнд зургадугаар сарын 14, 15, 16-нд авна. Хугацааны хувьд математик, физик, хими гэсэн хичээлийн үргэлжлэх хугацаа 100 минут. Бусад хичээлийн шалгалт 80 минут үргэлжлэх журамтай.