Нийслэлийн эрчим хүчний эх үүсвэр болох V цахилгаан станцыг хаана барих эсэх нь тодорхойгүй, газар олдохгүй байна гэх үндэслэлээр бэлтгэл ажил нь хангагдахгүй байсан. Тэгвэл Нийслэлийн Засаг дарга бөгөөд Улаанбаатар хотын захирагч Э.Бат-Үүл захирамж гаргаж Баянзүрх дүүргийн 11 дүгээр хорооны нутаг дэвсгэрт, Урган наран хорооллын урд талын автозам болон төмөр замын хооронд Хөлийн голын хөндийг 43 га газрыг “Улаанбаатар дулааны V цахилгаан станц”-ыг барих зориулалтаар Эрчим хүчний яаманд 15 жилийн хугацаатайгаар эзэмших эрх олгожээ. Мөн захирамжид Улаанбаатар дулааны V цахилгаан станцын барилга байгууламжийн архитектур төлөвлөлт, зургийн даалгаврыг боловсруулсны дагуу зураг төслийг батлах, барилга угсралтын ажилд хяналт тавьж ажиллахыг Улаанбаатар хотын ерөнхий архитектор бөгөөд нийслэлийн Ерөнхий төлөвлөгөөний газар Н.Нацагдоржид, газар эзэмшүүлэх гэрээг зохих журмын дагуу байгуулах, гэрчилгээ олгохыг нийслэлийн Өмчийн харилцааны газар Ш.Төмөрбаатарт даалгасан байна.