Засгийн газрын “Сонгодог урлаг-II” хөтөлбөрийг хэрэгжүүлэх ажлын хүрээнд мэргэжлийн урлагийн байгууллагуудын хөгжмийн зэмсгийг шинэчлэх үйл ажиллагааг хэрэгжүүлж байна. “Энэ ажлын хүрээнд Монгол Улсын Ерөнхийлөгчийн Тамгын газар, Улсын Филармонийн хооронд санамж бичиг байгууллаа. Санамж бичигт Монгол Улсын Ерөнхийлөгчийн Тамгын газрын дарга П.Цагаан, Улсын Филармонийн дарга Ч.Даваасүрэн нар гарын үсэг зуржээ. Санамж бичгийн хүрээнд хэд хэдэн ажил хэрэгжүүлэх юм.
Японы Шизуока мужийн ард иргэдээс хандивласан хөгжмийн зэмсгийг Монгол Улсын Ерөнхийлөгчийн Тамгын газраас Улсын Филармонийн Симфони найрал хөгжимд хүлээлгэн өгөх гэнэ. Улсын Филармони нь Японы иргэдээс хандивласан хөгжмүүдийг хүлээж аваад уг хөгжмийн зэмсгийн нэр төрлийн дагуу хуучин хэрэглэж байсан хөгжмүүдээ Дорнод аймгийн Хөгжимт драмын театрт шилжүүлэн хүлээлгэж өгөхөөр болжээ.
