Солонгосын баячууд хэр баян болохыг санхүүгийн Хана институт судалжээ. Тэд нэг тэрбум воноос дээш эд хөрөнгөтэй 784 хүний амьдрал ахуйг судалж, дүнгээ гаргасан байна. Өмнөд Солонгосын хүн амын 0,3 хувь буюу 156 мянган хүн нэг тэрбум воноос дээш эд хөрөнгөтэй буюу өөрөөр хэлбэл баян чинээлэгт тооцогдох хүмүүс байдаг аж.  Тэдний сарын дундаж орлого 39,11 сая вон байдаг бөгөөд үүнээсээ дунджаар 10,14 саяыг нь хэрэглээндээ зарцуулдаг байна. Гэвч баячууд гэх тодорхойлолтод багтах эдгээр хүмүүсийн 70 гаруй хувь нь өөрсдийгөө баян гэж огтхон ч боддоггүй бөгөөд дор хаяж 11 тэрбум вонтой болж байж чинээлэг амьдралтайд тооцно гэж үздэг аж.   Баян айлуудын амьдралын хэв маягийг судлахдаа тэдний хүргэн, бэр сонгохдоо яаж ханддагийг ч бас тандсан байна. Чинээлэг эцэг эхчүүд охиноо хүнтэй суулгахдаа хүргэнийхээ орлогыг голчлон хардаг бол хүүтэй айлууд бэрийнхээ удам угсааг чухалчилж үздэгээ хэлсэн байна.