АНУ-ын Нууц албаны даргаар анх удаа эмэгтэй хүн томилогджээ. Нууц албаны ажлын албаны даргаар ажиллаж байсан Жулия Пирсон энэ тушаалд томилогдсон байна. Нууц албаны өмнөх дарга Марк Сулливан өнгөрсөн сард тэтгэвэртээ гарахаа мэдэгдсэн юм.
АНУ-ын нууц алба Ерөнхийлөгч болон түүний гэр бүлийг хамгаалахаас гадна санхүү, эдийн засгийн холбогдолтой хэргийг шалгадаг. Өнгөрсөн онд тус албаны бие хамгаалагчид Ерөнхийлөгчийн айлчлалаар явж, үүрэг гүйцэтгэж байхдаа тэндэхийн биеэ үнэлэгчидтэй холбогдсон нь илэрч, нэлээд дуулиан шуугиан болсон билээ. Тиймээс шинэ даргын өмнө Нууц албаны энэ сэвтсэн нэр хүндийг сэргээх үүрэг ногдож байна.
Жулия Пирсон Флоридагаас гаралтай, 1983 оноос нууц албанд ажиллаж эхэлсэн туршлагатай гэнэ. Тэрээр 1988 оноос Ерөнхийлөгчийг хамгаалах хэлтэст дөрвөн жил  ажиллаж байсан аж.