Египетийн Шаркия мужийн Нил мөрний эрэг дээрх Аль-Гуиндия тосгоны оршин суугчид нэг хулгайчийг хөөж барьж аваад хэдэн арвуулаа нийлж модонд хүлж байгаад тал талаас нь зодож нүдэн аминд нь хүрсэн байна.
Тус оронд өрнөсөн өнгөт хувьсгалаас хойш ийм байдлаар шүүх явдал газар авч байгааг хэвлэл мэдээллийн хэрэгслүүд бичиж байна. Ердөө хэдхэн хоногийн өмнө гуравдугаар сарын 17-нд Саманод хотод зорчигчийн моторт дугуй хулгайлсан хоёр хулгайчийг барьж авсан хүмүүс мөн л зодож, авто вокзалд хөлөөс нь дүүжилж амийг нь хөнөөгөөд, цогцосыг нь ойролцоох цагдаагийн хэсгийн дэргэд хаясан хэрэг гарсан юм. Энэ хэрэгт олон мянган хүн оролцсон байна.
Энэ хэргийн дараагаар Египетийн Хуульзүйн сайд Ахмад Мекки Туркийн хэвлэлд ярилцлага өгч хэрэгтнийг ийнхүү ард иргэд ямар ч шүүх, хууль ёсгүйгээр шүүх явдлыг буруушаан, гэмт хэрэгтнийг шударга шүүхэд шилжүүлж, хуулийн дагуу цээрлүүлж байхыг ард иргэдэд уриалсан юм.
Ард иргэд ийнхүү, “сайн дурын эргүүл” гарган, “шүүх хороо” байгуулах явдал түгээмэл болж хууль бусаар ажиллаж, цагдаагийн байгууллагын ажлыг өмнөөс нь хийж байгааг эсэргүүцэн Египетийн цагдаа нар хэдэн өдрийн өмнө ажил хаяж байгаагаа мэдэгдэж байсан юм.
