Жил бүрийн гуравдугаар сарын 23-нд дэлхий нийтээрээ “дэлхийн цаг” хэмээх эко кампани зохион байгуулж, энэ өдрийн аль нэг цагт нь дэлхийн томоохон барилга байгууламжууд гэрэл цахилгаанаа унтраадаг уламжлалтай. Энэ нь улс орнуудын засгийн газар, аж ахуй эрхлэгчид, бизнесмэнүүд нэгэн дуугаар дэлхийн  дулааралтай чадлынхаа хэрээр тэмцэж байгаагаа илэрхийлж дуу хоолойгоо нэгтгэж байгаа хэрэг.
Дэлхий дахинд алдартай том барилга болох Сиднейн дуурийн театр, Сиднейн гүүр, Токиогийн цамхаг, Тайпей 101 цамхаг, Хятадын цагаан хэрэм,  Олимпын Шувууны үүр цэнгэлдэх хүрээлэн зэрэг байгууламжууд гэрлээ унтрааж нэгддэг юм.
Онгон зэрлэг байгалийг хамгаалах олон улсын сангаас зохион байгуулж 2007 онд Сиднейгээс эхэлсэн “Дэлхийн цаг” арга хэмжээ бол манай гариг дээр болдог хүн төрөлхтний түүхэн дэх олон улсыг хамгийн өргөн хамарсан ажиллагаа юм. Өнгөрсөн 2012 онд гэхэд л дэлхийн 150 орны 7000 орчим хотын 1,5 тэрбум хүн гэрлээ унтрааж хамрагдсан юм.