Америкийн интернэт корпорац “Google Inc”-ийн 2012 оны жилийн орлого нь 50 тэрбум ам.доллараас давжээ. Ингэснээр 2011 оныхтой харьцуулбал орлого нь бараг гучин хувиар нэмэгдсэн бол цэвэр ашиг нь 10 хувиар нэмэгдэж, 10,74 тэрбум ам.долларт хүрэв. 2012 оны дөрөвдүгээр улиралд “Google”-ийн цэвэр ашиг өнгөрсөн жилийн мөн үеийнхээс 6,6 хувь нэмэгдэн 2,89 тэрбум ам.долларт хүрсэн байна. 2011 оны дөрөвдүгээр улиралд тус компани нь 2,71 тэрбум ам.долларын ашигтай ажиллаж байжээ. Харин санхүүгийн гүйлгээнээс олсон ашиг нь 3,4 хувиар буурч 3,39 тэрбум ам.доллар болсон аж.

“Google”-ийн ашиг ингэж нэмэгдсэн нь гар утасны ба интернэт сурталчилгааны зах зээл ихээхэн нэмэгдсэнтэй холбоотой гэж мэргэжилтнүүд үзэж байгаа юм. “Google” нь интернэт рекламын зах зээлийн 41 хувийг эзэлдэг.

Дашрамд сонирхуулахад “Google” компанийг 1998 онд Ларри Пейж, Сергей Брин нар үүсгэн байгуулж 2004 онд хувьцаагаа бирж дээр гарган 1,9 тэрбум ам.долларын санхүүжилт авч байсан билээ. Өдгөө энэ компани нь дэлхийн хайлтын зах зээлийн 80 хувийг эзэлдэг бөгөөд гол орлогоо хайлттай холбоотой онлайн сурталчилгаанаас олдог. “Google” нь интернэт хайлтаас гадна дэлхийн хамгийн алдартай видео хостинг “YouTube”-ийг эзэмшдэг, электрон шуудангийн “Gmail” үйлчилгээг эрхэлдэг, олон нийтийн “Google+” сүлжээг ажиллуулдаг, гар утсанд зориулагдсан “Android” үйлдлийн системийг боловсруулсан билээ.