Драмын урлагийн шилдгийг тодруулах “Гэгээн Муза” наадмын тов гарчээ. Ирэх гуравдугаар сарын 27-нд болох тус наадамд оролцох орон нутгийн театруудын нэр эхнээсээ тодорчээ. “Гэгээн муза 2012”-т “Сонгодог урлаг II” хөтөлбөрийн хүрээнд орон даяар зарласан уралдаанд шалгарсан Дорнод, Завхан, Дархан-Уул аймгийн Хөгжимт драмын театр оролцох юм байна.
Мөн “Гэгээн Муза” наадамд нэр дэвшүүлэх бүтээлийг тодруулах комиссынхон хөдөө орон нутгаар явж шалгаруулалт хийж эхэлжээ. Одоогоор Архангай аймгийн Хөгжимт драмын театрынхан найруулагч Ч.Түвшингийн “Тамын дурлал” жүжгээрээ оролцохоор шалгарчээ. Харин УДЭТ-ын уран бүтээлчдийн хувьд өнгөрсөн жил тайзнаа амилуулсан хоёр томоохон бүтээл болох алдарт У.Шикспирийн “Гамлет”, Японы “Гэнжийн тууль”-иас сэдэвлэн бүтээсэн “Эсрэг дурлал” жүжгээ сойсон гэнэ. Гуравдугаар сарын эхээр уг наадамд оролцох театруудын нэр бүрэн тодорч, 20-ноос бүтээлүүдийг УДЭТ-ын тайзнаа тоглон үзэгчдийн хүртээл болгох юм.
