Төрийн үйлчилгээг хүндрэл чирэгдэлгүйгээр иргэдэд хүргэх автомат машиныг Засгийн газраас дэмжвэл бүх аймаг, сумд болон нийслэлийн дүүргүүдэд суурилуулахаар болжээ. Энэ машинаас олон нийтийг хамгийн их бухимдуулж, дараалал үүсгэдэг иргэний бүртгэл, лавлагаа, өргөдөл гэх мэт үйлчилгээг нэг минутын дотор авч болох нь. Түүнчлэн уг машинаар дамжуулан 300 гаруй төрлийн үйлчилгээ авах боломжтой бөгөөд иргэдийн цагийг хэмнэх ач холбогдолтой гэсэн. Энэ талаар Мэдээлэл технологийн үндэсний зөвлөлийн гишүүн Р.Отгонтулга “Машиныг ашиглахдаа эхлээд иргэний цахим үнэмлэхний ард байдаг бар кодыг уншуулах ёстой. Үүний дараа хурууныхаа хээг шалгуулж, самбараас өөрийн авах үйлчилгээг сонгож үйлчлүүлэх юм. Үйлчилгээ авсныхаа төлбөрийг бэлнээр болон картаар хийх боломжтой. Энэ нь лавлагаа авах үнэтэй адилхан” гэв.
Уг автомат машиныг өнөөдрийн байдлаар дэлхийн хэд хэдэн орон түгээмэл хэрэглэж буй бөгөөд нэг бүрийнх нь үнэ 7500 ам.доллар аж. Одоогоор туршилтын журмаар Хонгконгт үйлдвэрлэсэн хоёр машин оруулж ирээд буй гэсэн.
