Монгол Улсын Засгийн газрын өнгөрсөн арванхоёрдугаар сарын 22-нд баталсан 190 дүгээр тогтоолоор нийслэлийн Засаг даргын Тамгын газрын бүтцийг шинэчилж, нийслэлийн Засаг дарга зургаан орлогчтой ажиллахаар баталсан байна. Тогтоолын дагуу нийслэлийн Засаг дарга Э.Бат-Үүл таван нэр дэвшигчийг ИТХ-ын тэргүүлэгчидтэй зөвшилцөхөөр хүргүүлсэн аж. Үүнийг Нийслэлийн ЗДТГ-ын дарга Ё.Гэрэлчулуун өнөөдрийн НИТХ-ын хуралдаанд танилцуулав. Санхүү, эдийн засгийн асуудал хариуцсан орлогч даргад Н.Батаа, Хот байгуулалт, хөрөнгө оруулалтын асуудал хариуцсан орлогч даргад С.Очирбат, Зам, тээвэр, дэд бүтцийн асуудал хариуцсан орлогч даргад Н.Гантөмөр, Хөдөлмөр эрхлэлт, нийгмийн хамгааллын асуудал хариуцсан орлогч даргад Ц.Буяндалай, Экологи, ногоон хөгжлийн асуудал хариуцсан орлогч даргад Т.Бат-Эрдэнэ нарыг нэр дэвшүүлжээ. Нийслэлийн ИТХ-ын тэргүүлэгчид асуудлыг хэлэлцээд дэмжсэн байна. Ийн НИТХ-ын тэргүүлэгчид дэмжсэн учраас нийслэлийн Засаг дарга захирамж гаргаж, орлогчдоо томилов.
