Орон нутгийн сурагчид амралтаараа хөдөө гэртээ харин малд явж байгаад чих, гар, хөлөө хөлдөөх нь бараг хэвийн үзэгдэл болсон гэхэд хилсдэхгүй. Тэгвэл хүйтний эрч чангарч байгаатай холбоотойгоор өвөлжилт хүндэрсэн аймгуудын цэцэрлэг, ерөнхий боловсролын сургуулиудад БШУЯ-аас зарим арга хэмжээг авч хэрэгжүүлэхээр болжээ. Энэ талаар БШУЯ-ны Бодлогын хэрэгжилтийг зохицуулах газрын дарга Д.Эрдэнэчимэгээс тодрууллаа.
-Алслагдсан аймгуудад өвөлжилт хүндэрснээс сургууль, цэцэрлэгүүд үйл ажиллагаа явуулахад бэрх болж байгаа гэсэн?
-Улаанбаатар хотын болон Баян-Өлгий, Баянхонгор, Булган, Дорнод, Завхан, Өвөрхангай, Сэлэнгэ, Увс, Хөвсгөл, Хэнтий, Дархан-Уул аймгийн нийт 13 сургууль, цэцэрлэгт түлээ нүүрс дутагдалтайгаас халаалт доголдож байгаа. Үүнийг шийдэх 856.5 сая төгрөгийн санхүүжилтийг яамны зүгээс гаргах болсон. Мөн ирэх оны эхний улиралд хүндрэл үүсгэж магадгүй байгаа Дорноговь, Төв, Ховд аймгийн найман сургууль, цэцэрлэг, дотуур байрны түлээ нүүрс, халаалтын 30.7 сая төгрөгийн зардлыг шийдвэрлэхээр холбогдох зохицуулалт хийж байна.
-Ерөнхий боловсролын сургуулиудын улирлын амралт хараахан эхлээгүй байна. Хүйтний эрч чангарах тусам ханиад томууны тархалт нэмэгддэг?
-Хүйтний эрч чангарч байгаа учраас хичээл сургууль амрах хүртэл аймаг, нийслэлийн Онцгой байдлын алба, Эрүүл мэндийн газар, сургууль, цэцэрлэгийн ажилтнуудыг онцгой байдалд ажиллах үүргийг БШУ-ы сайдын зүгээс өгсөн. Тухайлбал, сургууль, цэцэрлэгтэй холбоо барих утасны жагсаалтыг гаргаж яам болон бусад холбоо барих зайлшгүй хэрэгцээтэй газруудад тараах, жагсаалтад орсон утасны дугаарыг заавал ажиллагаатай байлгах гээд наад захын зүйлийг нарийн тооцоолж үүрэг өгсөн. Анги танхимын халаалтын хэмийг нэг хэмд байлгахыг даалгасан болохоор ханиад томууны тархалтын асуудал гайгүй болов уу.
-Улирлынхаа амралтаар гэртээ харих гэж явсан хүү осгож амь насаа алдсан хэрэг гарч байсан. Яг ид хүйтний үед амралт таарч байна. Үүнд ямар нэг зохицуулалт хийсэн үү?
-Манай яамны зүгээс сургуулиудад хүргүүлсэн үүрэг чиглэлд сурагчдын амралт эхлэх үеэр сурагчдыг эцэг эхийнх нь гарт хүлээлгэн өгөх тухай заасан. Тийм болохоор хэрэв чиний хэлсэн шиг хэрэг гарвал сургуулийнх нь захирал, захиргаатай хариуцлага тооцно.
-Яамнаас сургуулиудад хүргүүлсэн үүрэг даалгавар дотор эцэг эхчүүдэд зориулсан зүйл ч бас бий. Энэ талаар?
-Эцэг эхчүүд хүүхдэдээ анхаарал тавих ёстой. Ханиад томуу хүрвэл яаралтай эмчид хандах хичээлийн үеэр хүүхдүүдээ сургуульд нь хүргэж өгөх, авахдаа зам товчлох зорилгоор эрсдэлтэй замаар дагуулж явахгүй байх, мөн цөмөрч болзошгүй гол мөрөнг гаталж болохгүй. Харин амралтынх нь үеэр ямар ч тохиолдол гарсан хүүхдийг малд явуулж болохгүй гэсэн чиг одоогоор өгөөд байна.
-Зам даваа хаагдсан энэ үед орон нутгийн сургуулийн дотуур байранд амьдардаг хүүхдүүдэд гэрээс нь хоол хүнс нь ирэхгүй байна гэж сонссон?
-Тийм зүйл гарч байгаа. Дотуур байрнаас нь өгдөг хоолыг хийх махгүй болсон тохиолдол ч гараад байгаа. Ийм үед сум орон нутгийн Засаг даргын тамгын газраас нь дэмжиж, хамтран ажиллах үүрэг өгсөн. Мөн дотуур байрны хүүхдүүдийн хоолны илчлэг, шим тэжээллэг байдалд анхаарал тавьж, халуун аарц, сүү, чацаргана уулгаж байхыг ч үүрэг болгосон.
