Улаанбаатар хотын Захирагчийн ивээл дор уламжлал болгон зохион байгуулдаг “Харшийн сүлд модны наадам” Монголын хүүхдийн ордонд боллоо. Дөрөв дэхь жилдээ зохиогдож байгаа сүлд модны наадамд нийслэлийн есөн дүүргийн эмзэг бүлгийн өрхийн 1000 хүүхдийг хамруулж тэдэнд Монголын хүүхдийн ордны багачууд тоглолтоо өргөн барьсан юм. Нийслэлийн Засаг дарга Э.Бат-Үүл сүлд модны наадмыг нээж “Хүүхэд бүрийн маргаашийг сайн сайхан байлгахын төлөө бид хичээн ажиллаж байна. Хүүхдийн амьдрах орчин эрүүл аюулгүй болж, хүүхэд бүхэн аз жаргалтай байх нь бидний хүсэж тэмүүлж байгаа шинэ нийслэлийг бүтээхэд хамгийн чухал нөлөө үзүүлэх юм” гэв.