Улаанбаатараас Дархан явах замд, Төв аймгийн Борнуур сумын нутагт байрлах “Урьхан” зоогийн газарт энэ сарын 10-ны 20:00 цагийн орчимд гал гарчээ. Тус зоогийн газрын барилга бүхэлдээ шатсан байна. Галыг Сэлэнгэ аймгийн Мандал сумын гал унтраах ангийнхан очиж унтаасан тухай НОБГ-ын албаны эх сурвалж мэдээлэв. Галын талаар Төв аймгийн Онцгой байдлын хэлтсийн дарга П.Ганбатаас тодруулахад, “Гал өчигдөр орой гарсан. Гал гарлаа гэдэг мэдээллийг манайд ирүүлсэн. Мэдээллийн дагуу Онцгой байдлын байцаагч, цагдаагийн байцаагчид явсан. Одоо ажиллаж байна гэсэн мэдээллийг дөнгөж саяхан бидэнд өгсөн. Галын шалтгааныг хараахан тогтоож амжаагүй байна. Эхлээд цагдаагийнхан эрүүгийн хэрэг үүсгэж шалгана, түүний дараа галын шалтгааныг тогтоох байх” гэсэн юм. Түүний хэлж байгаагаар галын шалтгааныг цагдаагийн байгууллагаас ирүүлсэн баримт ирүүлсний дараа тогтоодог юм байна.
