“Gangnam Style” дуугаар дэлхий даяар алдаршаад байгаа Өмнөд Солонгосын дуучин PSY хэдэн жилийн өмнө АНУ-ын эсрэг хөдөлгөөнд оролцож явсандаа уучлал эржээ. Тэрээр Өмнөд Солонгос, Иракт АНУ-ын цэргийн бааз байлгахыг эсэргүүцсэн хөдөлгөөний нэгэн концертод оролцож байжээ. Түүгээр ч барахгүй тоглолтын үеэр Америкийн танкийг дуурайлган хийсэн загварыг хага цохин, эвдэлж байсан гэнэ.
PSY энэхүү мэдэгдлээ “Вашингтоны зул сар” хэмээх телевизийн баярын концертод оролцохынхоо өмнө хийж байгаа нь өмнө хийж байсан үйлдлээсээ болоод америк үзэгчдээ алдахгүй гэснийх бололтой. Тэрээр урьдын болчимгүй үйлдэлдээ дандаа харамсч явдаг гээд “Америк цэргүүд миний эх орон болоод дэлхий дахины ардчилал, эрх чөлөөг хамгаалахын төлөө тулалддаг гавьяатай хүмүүс” хэмээн хэлжээ.
Энэ сарын 21-нд болох баярын концертыг АНУ-ын Ерөнхийлөгч Б.Обамагийн гэр бүл үзэх юм байна.
