Хан-Уул дүүргийн нутагт дэвсгэрт байрлах “Хатан туул” хотхонд чоно орж иржээ. Оршин суугчдын мэдээлж буйгаар уг чоно тус хотхонд тав  хоносон аж. Мэдээллийн дагуу өнөөдөр 13 цагийн орчим “Хатан туул” хотхонд очиход дүүргийн цагдаагийн хэлтэсийнхэн чоно байгаа газрыг хамгаалалтад авч хүн орохыг хориглосон байлаа.


Дуудлагыг хотхоны нэгэн оршин суугч цагдаагийн байгууллагад өгч  дүүргийн цагдаагийн албан хаагчид ирээд хоёр цаг гаруй болоод байв. Харин чоныг яах талаар холбогдох албаны хүмүүсээс тодруулахад ямар арга хэмжээ авах талаар одоогоор мэдэгдэх юм алга. Ямар ч байсан Онцгой байдлынхан болон байгаль орчныхон ирээд унтуулдаг тариа хийтэл хэнийг ч дотогш нэвтрүүлэхгүй.  Ямар ч халдварт өвчинтэй чоно байж мэднэ хэмээж байв. Харин оршин суугчид  энэ чоно ямар ч халдварт өвчинтэй амьтан биш. Чоно  илүү тэнгэртэйдээ алуулж ижил тэнгэртээдээ харагддаг амьтан хэмээн бэлгэшээж байгальд нь тавьж явуулах хүсэлтэй байгаагаа ярьж байсан юм. Харин хаанаас орж ирсэн чоно гэдгийг хэн ч мэдэхгүй байлаа.


Л.Батнасан: Хөл хөдөлгөөн тасарсан хойно хашааны нэг булангаар л орж ирсэн байх

“Хатан туул” хотхоны  СӨХ-ын дарга  Л.Батнасан бөгөөд түүнтэй цөөн хором ярилцлаа.

-Чоно орж ирсэн гэдгийг хэзээ мэдсэн бэ. Хүн рүү дайрсан гэсэн мэдээлэл  байна уу?
-Манай харуул анх нохой явж байна гэж харж байсан. Гэтэл өглөө баахан хүмүүс бужигналдаад байхаар нь  чоно орж ирсэн гэдгийг мэдсэн. Зулзган чоно байна билээ. Аюулгүй болгоод байгаль дэлхийд нь тавих  юм уу эсвэл судалдаг байгууллагад нь өгөх хэрэгтэй байх.  Бид энд буун дуу гаргаж хамаагүй алмааргүй байна. Хүмүүсийн амгалан тайван байдлыг бодсон ч тэр. Иргэд рүү дайрсан гэсэн юм байхгүй.
-Танай хотхон уултайгаа хэр ойрхон бэ. Өмнө нь хашаанд чинь ямар нэгэн ан амьтан орж ирсэн байсан уу?
-Уулнаас 200-300 метр зайтай. Гэхдээ энэ чоныг уул дагаж орж ирсэн үү  гэдгийг мэдэхгүй байна. Өлссөн чоно хоол хайж орж ирээд л гарах учраа олохгүй хэвтэж байгаа байх. Тэрнээс биш хүн барьж авч ирээд тавиагүй. Хүмүүс янз бүрээр л тайлбарлаж байна.
-Хотхон битүү хашаатай юм байна. Тэгэхээр чоно хотхоны хаалгаар л орж ирсэн байж таарах нь. Хамгаалалтын албаныхан  хаалгаар орж ирэхийг нь хараагүй юм уу?
-Шөнө хөл хөдөлгөөн тасарсан хойно л хашааны нэг булангаар л ороод ирсэн байх. Одоо камераа шүүх гээд л байж байна. Саарал өнгөтэй жижиг чоно байна билээ.
 Ингээд цаг гаруйн хугацаа өнгөрөхөд  Байгаль орчны яамны байцаагч нар ирж мөн хэсэг хугацааны дараа хот тохижилтынхон ирж чоныг буудаж “портер” машинд ачин авч одсон юм. Оршин суугч Л.Батбаяр “Энэ чоно өлсөөд л хоол эрж наашаа ирсэн байх. Тав хоноход хүмүүс нохой явж байна л гэж хараад байсан. Өдөр нуугдчихаад орой гарч ирдэг. Би хааяа мах шидэж өгдөг байсан. Ууландаа идэх юм олдохоо байгаа байлгүй дээ. Одоо ер нь хэцүү цаг болсон. Байгаль эх, ан амьтнаа ч хайрлах хүн цөөрөөд байна шүү дээ. Байгальд нь буцааж тавих хэрэгтэй байсан юм” хэмээн халаглан ярьсан юм. 1995 онд онд Богд уулнаас буга, чоно орж ирсэн гэнэ гэсэн мэдээлэл тасардаггүй байсан. Бүр  Хүүхдийн паркад буга бэлчиж байдаг байсан. Дээрх үйл явдал нь тухайн үеийг санагдуулав.