Тосонцэнгэлийн иргэд Улаанбаатар хотод түргэн шуурхай ирж, очих боломжтой болжээ. Орон нутгийн хөгжлийг дэмжих, алслагдсан бүс нутгийн иргэдэд нийгмийн үйлчилгээг хүргэх үүднээс ИНЕГ-аас алслагдсан чиглэл болох Ховд аймгийн Булган, Увс аймгийн Баруунтуруун, Завхан аймгийн Тосонцэнгэл, Сүхбаатар аймгийн Баруун-Урт суманд нислэг сэргээх боломжийг судалж үзжээ. Ингээд холбогдох тооцоог үндэслэн татаастай нислэгийг дээрхи чиглэлүүдэд сэргээх саналыг Зам тээврийн яаманд хүргүүлсэн аж. Энэхүү саналыг яамнаас судалж, шийдвэрлээд эхний ээлжинд Ховдын Булганы чиглэлийг өнгөрсөн зургадугаар сараас сэргээсэн бол өчигдрөөс Улаанбаатар-Доной-Тосонцэнгэл-Улаанбаатар чиглэлийн нислэгийг сэргээхээр болсон байна. Харин Тосонцэнгэлийн иргэдэд иргэний агаарын тээврийн “Изинис эйрвэйз” ХХК-ийн “Сааб-340” маркийн 34 хүний суудалтай агаарын хөлөг үйлчлэх аж.