Манай улсад 140 шахам мянган хөгжлийн бэрхшээлтэй иргэд байгаа статистик гарчээ. Тэднийг хэдийгээр хөгжлийн бэрхшээлтэй гэдэг ч өөртөө туслах бүлэг, хоршоо байгуулаад оёдол хийх, цэцэг, ногоо тарих, мал, амьтан тэжээхээс аваад хэнээс ч дутахгүй ажил хөдөлмөр эрхлэж, амьдралаа биш юм гэхэд өөрсдийгөө болгоод явдаг. Харин бусдаас дутахгүй ар гэр, амьдралаа залгуулаад явья гэхэд тэднээс бус, нийгмээс шалтгаалсан зүйл мундахгүй байдаг. Жишээ нь, хамтарсан хөдөлмөрөө өргөжүүлэхийн тулд зээл авья гэхэд хөдөлмөрийн чадвар алдалттай, тогтмол орлогогүй юм байна гэдгээр санхүүжилт олгодоггүй. Мөн хөгжлийн бэрхшээлтэй иргэдийн нэр дээр үл хөдлөх хөрөнгө байж болохгүй гэх мэтээр бэрхшээл бий. Энэ бүхнийг шийдэж өгнө үү хэмээн тэд шинэ төр, засгийг харж сууна.
