Эрүүл мэндийн яамнаас харьяа төв эмнэлэг болон нийслэлийн төвийн зургаан дүүргийн эрүүл мэндийн байгууллагуудын эзэмшиж буй газрын тооллогын судалгаа хийж эхэлжээ. Эрүүл мэндийн байгууллагуудын эзэмшлийн газрын баталгаажилтыг мөрдөхгүй байгаагаас барилга барих зөвшөөрөл олгодог, түргэн тусламжийн автомашин нэвтрэх замыг хаасан, авто зогсоол байхгүй зэрэг зөрчил үүсч хүн амд эрүүл мэндийн тусламж үйлчилгээг цаг тухайд нь хүргэж чадахгүй байгаа. Нөхцөл байдал хүнд байгаа тул газрын зөрчил, маргаан болон эмнэлгийн тусламж үйлчилгээг хэвийн явуулах боломжийг бүрдүүлэхэд дэмжлэг үзүүлэх саналыг Эрүүл мэндийн сайд Н.Удвал энэ сарын 29-ны өдөр Нийгмийн бодлого, боловсрол, соёл, шинжлэх ухааны байнгын хороонд хүргүүллээ. Тооллогын нэгдсэн дүнг ирэх сарын 2-ны дотор ЭМЯ авч хэлэлцээд, цаашид зөрчил, дутагдлыг арилгах чиглэлээр тодорхой саналыг уг байнгын хороонд дахин хүргүүлэх юм байна.
