Алдарт хөлбөмбөгч Дэвид Бекхэм, дуучин, загвар зохион бүтээгч Виктория Бекхэмийн бага охин Харпер, жүжигчин Том Крузын ганц охин Сури гээд оддын хүүхдүүдийн гоё дэгжин хувцаснаас болж барууны чинээлэг эцэг эхчүүд байн байн хүүхдийн дэлгүүр зорих хэрэгтэй болжээ. Оддын хүүхдүүдийн дэгжин ганган хувцаслалтыг дуурайж үр хүүхдээ хувцаслах гэсэн эцэг эхчүүд дизайнеруудын урласан брэнд хувцсанд гар татахаа ч больсон гэдэг нь саяхан “Marks and Spenсer” фирмийн захиалгаар Оксфам судалгааны төвийн явуулсан олон нийтийн санал асуулгаас харагджээ. Судалгаанаас харвал нэг ой хүртэлх насны хүүхдүүдийн хувцасны шүүгээнд дунджаар 56 гадуур хувцас байх болсон бөгөөд эцэг эхчүүд тэднийгээ хувцаслах гэж эхний нэг жилд 327 фунтээс дээш мөнгө зарцуулдаг болсон байна. Шинээр мэндэлсэн хүүхдүүд эхний жилдээ ойр дотны хүмүүсийн бэлэглэсэн хувцсаар болгочихдог байсан үе ард хоцорсон бөгөөд эцэг эхчүүд бэлэгний хувцсыг загварын сонголт муутай хэмээн хүүхдүүддээ өмсүүлэхээ больсон гэнэ. Судалгаанд оролцсон гэр бүлийн гуравны хоёр нь ийм шалтгаанаар хүүхэддээ бэлэгний хувцас өмсүүлэхээс татгалздаг гэдгээ хэлсэн байна. Мөн судалгаанд оролцсон эцэг эхчүүдийн гурваны хоёр нь Харпер Бекхэм, Сури Круз гээд оддын хүүхдүүдийн өхөөрдөм хөөрхөн, мэдээж өндөр үнэтэй хувцсыг хараад өөрийн эрхгүй хүүхэддээ авч өгөх бодол төрдөг гэж ярьсан байна.