УИХ дахь МАХН-МҮАН-ын “Шударга ёс” эсвлийн бүлгийн хурлаар дөрвөн асуудал хэлэлцсэний нэг нь Монгол Улсын засаг захиргааны нэгж, түүний удирдлагын тухай хуульд өөрчлөлт оруулах тухай хуулийн төсөл байв. Тус бүлгийнхэн энэ хуулийн төслийг дэмжиж, орон нутгийн сонгуулиас өмнө батлах шаардлагатай гэж үзжээ.

Хэдхэн хоногийн өмнө өргөн барьсан хуулийн төслийг хэлэлцэж баталлаа гэхэд энэ удаагийн орон нутгийн сонгуулийн үеэр хэрэгжүүлэх боломж бүрдэх үү гэсэн асуултыг “Шударга ёс” эвслийн бүлгийн дарга Н.Батцэрэгт тавилаа.

-УИХ-ын гишүүн Р.Гончигдорж, Д.Батцогт нарын өргөн барьсан хуулийн төслийг орон нутгийн сонгуулиас өмнө баталж, хэрэгжүүлэх боломжтой. Монгол Улсын засаг захиргааны нэгж, түүний удирдлагын тухай хуульд өөрчлөлт оруулах тухай хуулийн цөөхөн зүйл заалтад өөрчлөлт оруулж байгаа учир цомхон хуулийн төсөл л дөө. Өөрөөр хэлбэл, сумын Засаг даргыг сонгохдоо тухайн сумын багийн иргэдээс санал хурааж, хамгийн олон санал авсныг нь сумын ИТХ дээд шатны буюу аймгийн Засаг даргаар батламжлуулна гэсэн заалт бий.

Орон нутгийн сонгууль арваннэгдүгээр сарын 21-нд болж, тэрнээс 7-10 хоногийн дараа орон нутгийн шинэ тутам байгуулагдсан ИТХ-ын ажил эхэлнэ. Тэдний хэлэлцэх анхны асуудал бол сумын Засаг даргад нэр дэвшүүлэх. Тиймээс орон нутгийн сонгуулийн дараа бүх сум багт дээрх шинэ хуулийн зохицуулалтын дагуу сумын Засаг даргаа сонгох нөхцөл бүрдэнэ. Дээрх хуулийн төслийг энэ долоо хоногт биш юм аа гэхэд ирэх долоо хоногт хэлэлцэж, батлах шаардлагатай.