Нүүрсийг жижиглэнгээр худалдаалдаг шуудайн хэмжээг томруулах санаачилгыг Шударга өрсөлдөөн, хэрэглэгчийн төлөө газар гаргасан нь эхнээсээ ажил хэрэг болж байна. Өнөөдөр Стандартчиллын үндэсний зөвлөл хуралдаж, ахуйн хэрэглээний хатуу түлш буюу нүүрсийг жижиглэнгээр худалдаалах шуудайны хэмжээ стандартыг албан ёсоор тогтоолоо. Стандартад зааж өгсөн ёсоор нүүрсний шуудай 15, 20, 40 килограммын багтаамжтай байх ёстой бөгөөд нүүрсний ширхэгийн хэмжээ 5 см-ээс багагүй байх аж.
Нүүрсний шуудайн стандартыг тогтоох ажлын хэсэгт Стандартчилал хэмжил зүйн газар, Ашигт малтмалын газар, Нийслэлийн хэрэглэгчдийн эрх ашгийг хамгаалах нийгэмлэг, Мянганы сорилтын сангийн цэвэр агаар сан төсөл, Нийслэлийн Засаг даргын тамгын газар, Хими технологийн хүрээлэнгийн төлөөллүүд багтсан юм.
