Өмнөговь аймагт өнгөрсөн дөрвөн жилд бүтээн байгуулалтын олон ажлууд хийгдсэн. Тус аймагт өнгөрөгч сонгуулиар Ардчилсан нам ялалт байгуулан орон нутгийн эрхийг дөрвөн жилийн хугацаанд барьсан бөгөөд ийнхүү хийсэн бүтээснээ тайлагнаж ард иргэдээрээ дүгнүүлэх ажилдаа ороод байна. Бүрэн эрхийн хугацаанд аймаг орон нутгийн хөгжлийг хангахад чиглэгдсэн 16 зорилт, 176 заалт бүхий мөрийн хөтөлбөр дэвшүүлэн ажилласан бөгөөд 2012 оны есдүгээр сарын байдлаар 94.6 хувийн үзүүлэлтээр амжилттай хэрэгжсэн дүнтэй байгаа аж. Өөрөөр хэлбэл үлдсэн хувийн үзүүлэлт нь энэ онд хэрэгжиж дуусах ажлууд байгаа юм байна.
Тэдний хийж бүтээсэн ажлаас онцлоход байгалийн баялаг, алт зэсний нөөцөөрөө гайхагдах тус аймаг давуу эрх эдэлж мөрийн хөтөлбөрийнхөө хүрээнд иргэн бүртээ 500 мянган төгрөг хүртээж тэдний ахуй амьдралд нь дэмжлэг үзүүлжээ. Мөн өнгөрсөн дөрвөн жилийн хугацаанд тус аймагт Монгол Улсын Ерөнхийлөгч, УИХ-ын дарга, Ерөнхий сайд болон бусад албаны төлөөлөгчид айлчилж, Монгол Улсын Засгийн газар анх удаа “Уур амьсгалын өөрчлөлт”-ийн асуудлаар Өмнөговь аймагт хуралдсан, “Гадаадын хөрөнгө оруулагчдын чуулга уулзалт”, Төвийн бүсийн хөрөнгө оруулалтын чуулга уулзалт, “Их говийн экологи ба Монгол тэмээ” олон улсын симпозиум зэрэг Монгол Улсын Засгийн газраас авч хэрэгжүүлсэн арга хэмжээнүүд болсон нь орон нутгийн хөгжилд чухал ач холбогдолтой болсон аж.
Мөн тус аймаг 2006 онд улсын төсөвт 1,1 тэрбум төгрөг төвлөрүүлж байсан бол 2011 онд 60,9 тэрбум төгрөгийг төвлөрүүлсэн нь эдийн засгаа хэрхэн сайжруулсныг илтгэнэ. Ингэснээрээ 2012 онд улсын төсөвт 118 тэрбум төгрөг төвлөрүүлэхээр зорилт тавин ажиллаж байгаа юм байна.
Мөн энэхүү дөрвөн жилийн хугацаанд Өмнөговьчууд орон нутгийн хөрөнгө оруулалтаар 140 гаруй иргэдийг орон сууцны нөхцлөөр хангаж, орон нутагтаа бүхэл бүтэн ДЦС барьсан, аймгийн хэмжээнд нийт 30 гаруй км хатуу хучилттай авто зам тавьсан, гэр хороололд засмал тавьж гэрэлтүүлгийн асуудлыг шийдсэн, олонхи сумаа 0,4-ийн ЦДАШ-д холбосон, 640 гаруй хүүхдийг сургуулийн өмнөх боловсролд хамруулсан, хамгийн их ажлын байр нэмэгдүүлсэн зэргээр дурдаад байх юм бол дуусашгүй олон амжилтыг бүтээж чаджээ.
