Наймдугаар сарын 27-ны өдрөөс эхлэн автомашиныг дугаараар нь хязгаарлан замын хөдөлгөөнд оролцуулж байгаа. Мөн нийтийн тээврийн автобусууд нэгдүгээр эгнээгээр зорчиж буй.
Нийслэлийн Засаг дарга Э.Бат-Үүл уг шийдвэрийг хоёр сарын хугацаанд туршиж үзнэ гэдгийг хэлсэн. Найман хоногийн дараа уг шийдвэрийн “хүчинтэй” хугацаа дуусна.
Ингээд энэ талаар Нийслэлийн Засаг даргын орлогч Н.Гантөмөрөөс тодрууллаа.
-Авто замын хөдөлгөөнийг бууруулахаар гаргасан Нийслэлийн Засаг даргын “туршилт” удахгүй дуусна. Үүнийг цаашаа сунгах болов уу?
-Нийслэлийн захирагчийн албанаас дур мэдэн шийдэхгүй. Юуны түрүүнд иргэдээс санал асуулга авна. Тэгээд үүнд үндэслэж цаашид яах эсэхээ шийдвэрлэх бодолтой байгаа. Автомашиныг дугаараар нь ангилж хөдөлгөөнд оролцуулах, нийтийн тээврийг нэгдүгээр эгнээгээр зорчих шийдвэрийг цааш үргэлжлүүлэх санал хэрэгжүүлсэн цагаас хойш тасралтгүй ирж байгаа.
-Иргэдээс энэ талаархи саналыг яаж авах вэ?
-Телевиз, шууд утас, мессэжээр гээд санал авахаар төлөвлөж байгаа.
-Хэзээ авах вэ?
-Аравдугаар сарын 22-нд байх болов уу.
-Хүмүүсийн хувьд хэрэгжүүлж эхэлсэн цагаас л ам сайтай байгаа. Хэрвээ санал асуулга аваад “ок” болчихвол шийдвэрийг шууд үргэлжлүүлэх үү?
-Мэдээж нийслэлийн иргэд юу хүсч байна тэдний талд шийднэ шүү дээ. Шууд л хэрэгжүүлнэ.
-Гэхдээ НИТХ-аар хэлэлцэнэ биз дээ?
-Тэгэлгүй яахав. Аравдугаар сарын 25-нд НИТХ-ын хуралтай. Энэхүү хурлаар эцэслэж шийднэ дээ.
-Автобусны нэгдүгээр эгнээгээр зорчих хэсгийг сунгах талаар санал оруулсан байсан. Нийтийн тээврийн компаниудаас ирүүлсэн санал уу?
-Нийтийн тээврийн компаниуд гэлтгүй Замын цагдаагийн газраас ирсэн санал хүсэлт. Зүүн дөрвөн замаас цааш Офицеруудын ордон, баруун зүгийг Таван шар хүртэл сунгах хүсэлт ирүүлсэн байгаа. Энэхүү асуудлыг ч гэсэн НИТХ-ын хурлаар авч хэлэлцэнэ.
