Өнгөрсөн зургадугаар сарын 10-наас хойш жолооны үнэмлэх өнөөг хүртэл хэвлэгдээгүй байгаа. Жолооны үнэмлэх хэвлэдэг компани нь техникийн шинэчлэл хийж байгаа нэрийн дор хойшлуулсаар өдий хүрсэн билээ. Аргаа барахдаа наймдугаар сарын 10-наас эхлэн жолооч барих шаардлагатай иргэдэд түр үнэмлэх олгож эхэлсэн юм. Ингээд энэ талаар Замын цагдаагийн газрын Олон нийттэй харилцах тасгийн дарга, цагдаагийн хошууч С.Энхбатаас тодрууллаа.
-Жолооны үнэмлэх хэзээнээс хэвлэгдэж эхлэх вэ?
-Удахгүй хэвлэгдэнэ. Өмнө нь жолооны үнэмлэх хэвлэж байсан “MDI” компанийн гэрээг цуцалсан. Замын цагдаагийн газраас нээлттэй тендер зарлаж олон шалгуур үзүүлэлтээр “Смарт солюшнз” компанийг сонгосон.
-Удахгүй гэдэг нь яг хэзээ юм бол?
-Энэ сарын 15-наас хэвлэнэ.
-Наймдугаар сарын сүүлээр гэхэд 28 мянган жолооны үнэмлэх хэвлэгдээгүй гэж байсан. Өнөөдрийн байдлаар хэчнээн үнэмлэх хүлээгдэж байгаа вэ?
- 30 мянга орчим үнэмлэх байгаа. “Смарт солюшнз” компани өдөртөө 2000-3000 ширхэг жолооны үнэмлэх хэвлэх хүчин чадалтай техник хэрэгсэлтэй ажиллах учраас цаашдаа хүндрэл үүсэхгүй. Овоорсон байгаа жолооны үнэмлэхийг 10-20 хоногийн дотор хэвлэх боломжтой.
