Өнгөрсөн долоо хоногийн бямба гарагт Нийслэлийн Засаг дарга бөгөөд Улаанбаатар хотын Захирагч Д.Сумъяабазарын урилгаар УИХ-ын дарга Г.Занданшатар болон нийслэлийн есөн дүүргээс сонгогдсон УИХ-ын гишүүд нийслэлийн удирдлагуудтай уулзсан. Энэ үеэр Хотын дарга 2021-2024 онд Улаанбаатар хотод хийж, хэрэгжүүлэх бүтээн байгуулалтын ажил, төсөл, хөтөлбөр болон эрх зүйн орчинд өөрчлөлт орж байгаатай холбогдуулан нийслэлийн төсөв, санхүүд тулгарч буй асуудлын талаар гишүүдэд танилцуулсан юм. Нийслэлийн есөн дүүргээс сонгогдсон гишүүдийг Хотын дарга урьж, ирэх жилүүдэд хийх ажлаа танилцуулж, санал солилцсон нь нийслэлийн түүхэнд анх удаа болсон үйл явдал байлаа.
Нийслэл хотод хуримтлагдсан, шүүмжлэл дагуулсан олон асуудал байна. Эдгээр асуудлыг нийслэл хот дангаараа шийдэхэд хүчин мөхөсдөж байна. Иймээс УИХ, Засгийн газартай хамтарч шийдэхээс өөр аргагүй нөхцөл байдал бий болоод удлаа. Ийм ч учраас нийслэлийн удирдлагуудтай уулзах үеэрээ УИХ-ын дарга Г.Занданшатар Нийслэлээс сонгогдсон гишүүдийн Түр хороо байгуулах санал санаачилга гаргасан юм. Үүнийг нийслэлийн есөн дүүргээс иргэдийн итгэлийг хүлээн, сонгогдсон 22 гишүүн дэмжин, хотын хөгжлийн төлөө хүчээ нэгтгэн Нийслэлээс сонгогдсон гишүүдийн Түр хороо байгуулах тогтоолын төслийг санаачлан, өргөн барихад бэлэн болжээ.
