Зэвсэгт хүчний 326 дугаар ангийн салаан захирагч, дэслэгч Г архи ууж, согтуурсан үедээ байлдагч Ц.Б-г зодож, гэмтээсэн талаар бид мэдээлсэн билээ. Байлдагч Б нь Төрийн тусгай албан хаагчдийн нэгдсэн эмнэлгийн Эрчимт эмчилгээний тасагт тархинд цус харвалттай гэх оноштойгоор эмчлүүлж байсан юм. Эмнэлэгт ирэх дээ маш хүнд ухаангүй комын байдалтай хүргэгдсэн. Харамсалтай нь, даргадаа зодуулсан байлдагч өнгөрсөн шөнө амьсгал хураажээ.
Өвчтөн хоёр хоногийн турш эмчлүүлж байгаад ухаан оролгүй, амьсгал зүрх судасны дутагдал, тархины цус харвалтын улмаас өчигдөр 23:00 цаг орчимд өөд болжээ.
Энэ талаар ЦЕГ-аас тодруулахад "Хэрэгтнийг хорьсон шалгаж байна" гэх мэдээллийг өгсөн юм
Талийгаач 19 настай бөгөөд Чингэлтэй дүүргээс өнгөрсөн аравдугаар сард цэргийн албанд татагдаад байсан юм. Тэрээр Энэтхэг Улсад шашны сургуульд дөрвөн жил сураад, өнгөрсөн зургадугаар сард эх орондоо ирсэн гэдгийг ээж нь хэлсэн билээ.
