УИХ дахь МАН-ын бүлгийн Сонгуулийн тухай хуульд өөрчлөлт оруулахаар боловсруулсан хуулийн төсөл өчигдрөөс эхэлж маргаан дэгдээв. Ажлын хэсгийнхний өгсөн мэдээллээр бол “Монгол Улсыг нэг тойрог гэж үзэн намууд 76 хүн нэр дэвшүүлнэ. Нэг иргэн нэг л нэр дэвшигчийг дугуйлах болно. Хамгийн олон санал авсан хүн нь УИХ-ын гишүүн болно” хэмээн тайлбарласан. Олны дургүйцлийг хүргэсэн энэ асуудлын талаар УИХ-ын гишүүн О.Баасанхүү өөрийн байр сууриа илэрхийлсэн юм. Тэрбээр “Энэ улс төрчид  улс төрөөс арчигдахаасаа айсандаа сонгуулийн хуулиар туршилт хийж байна. Сүүлийн үеийн судалгаануудаас харахад МАН, АН аль аль нь ретинг муутай байгаа. 70 гаруй хувь нь энэ хоёр намыг дэмжихгүй байгаа нь анзаарагдсан. Би энэ улстөрчдөд хандаж гурван зүйлийг зөвлөж байгаа. Нэгт сонгуулийн тогтолцооны асуудлыг шийдэх, хоёрт утаанаас салах, гуравт 60 тэрбумын асуудлаас салах хэрэгтэй гэж. Үүний дараа л сонгуулийн хуулийг шинэчлэх асуудлыг ярих хэрэгтэй байсан юм” гэлээ.