Энэ сарын эхний өдрөөс Нагорный Карабахын асуудлаас болон эхэлсэн Азербайжан, Армяны дайнд амь үрэгдэгсдийн нийт тоо 60 хүрлээ гэж мэдээллээ. Энэ сарын 1-5-ны өдрүүдэд мөргөлдөөний тэргүүн бүсэд азербайжаны армийн 29 цэрэг амь үрэгдэж, 72 цэрэг шархадсан бол 28 хүн сураггүй алга болсон гэж Нагарный Карабахын батлан хамгаалах армийн оперативын хэлтсийн дарга Виктор Арустамян мэдээлснийг “Кавказский узел” хэвлэл иш татжээ.

Азербайжаны арми нийтдээ 2000 орчим хүнээ алдсан гэж Арустамян хэлээд үүнийг азербайжаны хилийн бүс дэх нэгэн тосгонд  амьдардаг эмэгтэйтэй утсаар ярьж тодруулсан гэсэн байна.

Харин Азрбайжаны Батлан хамгаалах яамны хэвлэлийн нарийн бичгийн дарга Вагиф Даргяхлы Нагорный Карабахын энэ мэдээллийг няцаагаад өнгөрсөн хугацаанд байлдааны явцад цэргийн 31 албан хаагч амь үрэгдсэн гэсэн байна. Үүний зэрэгцээ нэг нисдэг тэрэг, бас нэг танкаа алдсан гэжээ.

Энэ дөрөвдүгээр сарын 2-ны шөнө Азербайжан, Армня улсын хил дээрх Нагорный Карабахад нөхцөл байдал хурцдан хоёр тал бие биеэдээ гал нээн байлдаж эхэлсэн юм. Талууд бие биенээ буруутган, эсрэг талаа илүү их хохирол амсч байна гэж мэдээлсээр байгаа юм.

Дөрөвдүгээр сарын 5-ны мягмар гарагт Ереван, Баку хоёр гал зогсоохоор тохирсныг карабахын цэргийнхэн “энэ бол улстөрийн удирдлагын тушаал” хэмээн хүлээн аваад байна.