Умард Солонгосын зүгээс ирэх өдөөн хатгалгын хариуд өндөржүүлсэн бэлэн байдалд байхыг Өмнөд Солонгосын Ерөнхийлөгч Пак Хын Хе  өөрийн захиргааны өндөр албаны хүмүүстэй хийсэн зөвлөгөөнийхөө үеэр анхаарууллаа гэж Рёнхап агентлаг дамжууллаа.

БНАСАУ-ын эсрэг НҮБ-ын Аюулгүйн зөвлөлөөс хориг тавьиад байгаа ч Умард Солонгосын удирдагч Ким Чен Ун өнгөрсөн долоо хоногт АНУ-ын аюулын эсрэг цөмийн зэвсэг, пуужингийн туршилт шинээр хийхэд бэлэн байхыг даалгасан юм.
“Олон улсны хамтын нийгэмлэг Умард Солонгосын эсрэг хатуу хориг тавиад байгаа ч энэ улс Ким Чен Уны даалгавраар цөмийн цэнэг, балластик пуужин туршихаар байнга өдөөн хатгаж байна” гэж Пак Хын Хегийн хэлснийг Рёнхап агентлаг иш татжээ. Тэр бас хэрвээ ийм хориг байгаагүй бол эдний өдөөн хатгалга бүр илүү, хүчтэй байх байлаа гэсэн байна.

1950-1953 оны Солонгосын дайн дууссанаас хойш Умард Солонгосын зүгээс 2,8 мянган удаагийн өдөөн хатгасан үйлдэл гарч энэ бүхний улмаас 5000 хүн амь үрэгдсэн гээд “Өнөөдөр бол Солонгосны хойгийн ирээдүйн тухайд илүү чухал цаг үе” гэжээ.

Нэгдүгээр сарын 6-нд Умард Солонгос цөмийн цэнэг туршсан бол хоёрдугаар сарын 7-нд цөмийн цэнэгт хошууг 12 мянган км тээх  пуужин тээгч туршсаны дараагаар Солонгосын хойгийн нөхцөл байдал улам хүндрээд байгаа юм.