Налайх дүүргийн тавдугаар хорооны нутаг, Бүс нуурын хойд энгэр гэдэг газар зусч байгаа Төв аймгийн Эрдэнэ сумын гуравдугаар багийн малчин Даваахүүгийн үнээ боомоор өвчилж үхжээ. Үүнтэй холбогдуулан Улсын Онцгой комиссын дарга, Шадар сайд М.Энхболд өнөөдөр Улсын Онцгой комиссыг зарлан хуралдуулж, цагийн байдлыг хэлэлцэн, авах арга хэмжээний талаар үүрэг өгсөн байна. Үхсэн малын сэг зэмд шинжилгээ хийж байгаа ч эцсийн хариу нь гараагүй байгаа гэнэ. Боом гарсан голомтод хязгаарлалтын дэглэм тогтоож, ариутгал, халдваргүйжүүлэлт хийх ажлыг эрчимжүүлэх, өвчний голомтод эргүүл, хяналт шалгалтын хэсэг гаргах, ариутгалын цэгийг Тэрэлж, зүүн аймгууд руу явах замд өнөөдрөөс ажиллуулж эхлэхээр шийдвэрлэсэн байна. Мөн гурван айлын 15 хүн, 1000 гаруй малыг дахин үзлэгт хамруулж, гартаа шарх авсан хоёр иргэнд үзлэг, шинжилгээ хийж, иргэдэд урьдчилан сэргийлэх мэдээ, мэдээлэл хүргэхээр болжээ. Цаашид шүлхий болон боом өвчний вакциныг цаг хугацаанд нь хийж дуусгах, халдварын голомтод байгаа айлын малыг нядлуулахгүй, сүү, цагаан идээг худалдаж борлуулахгүй байхад хяналт тавихаар болжээ.