Өчигдөр Орос орон даяар тэмдэглэсэн  Эх орноо хамгаалагчдын өдрөөр Москва орчмын Химкад  Эх орны дайны үеэр цэргийн эмнэлэг байсан өнөөгийн Москвагийн соёлын дээд сургуулийн байрны үүдэнд цэргийн эмч, сувилагчдын дурсгалыг хүндэтгэсэн хөшөө нээсэн байна.

Цэргийн эмч, хижээлдүү сувилагч хоёр эдгэрсэн цэрэг эрийг фронтод үдэж өгч байгааг дүрсэлсэн энэ хөшөөг нээхэд ОХУ-ын Соёлын сайд Владимир Медицинский “Дайны үед цэргийн эмнэлгээр эмчлүүлэгсдийн 77 хувь нь буюу 17 сая хүн эдгэрээд эргэж фронтод явж байсан юм. Тэр цагт манай эмнэлгүүдэд маш сайн эм байсан гэж бодохгүй байна, манай эмч нар маш хүрэлцээтэй байсан ч гэж бодохгүй байна. Ганцхан манай эмч, сувилагч нар алтан гартай байсан юм” гэж хэлжээ.

1943-1945 онд өнөөгийн дээд сургуулийн гуравдугаар корпуст цэргийн эмнэлэг байрлаж дайнд шархадсан 5000 гаруй цэрэг офицерийн амь насыг аварч байжээ.

Үүний зэрэгцээ цэргийн эмч сувилагчдын хөшөөг Москва хот орчмын цэргийн эмнэлэг байрлаж байсан газруудад байрлуулна гэж ОХУ-ын БХЯ-ны Цэргийн эмнэлгийн газрын дарга хошууч генерал Александр Фисун хэлж байна.

Аугаа их Эх орны дайны жилүүдэд улаан армийн 22,3 сая цэрэг офицер цэргийн эмнэлгүүдэд хэвтэн эмчлүүлж цэргийн болон  энгийн эмч сувилагчдын ачаар шархдагсдын 72 хувь нь, нийт өвчтөний 90 хувь нь эх орноо хамгаалахаар  эргэж жагсаалдаа орсон гэж тэр дурджээ.

Дайны жилүүдэд цэргийн эмнэлгийн алба өөрийн 210 мянга гаруй хүнээ алдсан, гэлээ ч цэргийн эмнэлгийн ажилтнууд эх орноо хамгаалах үүргээ нэр төртэй биелүүлсэн гэж цэргийн эмч дурдсан  байна.