А.ЦАГААН

“Мартагдашгүй” тоглолтынхоо өмнөхөн гэргийгээ хүнд өвчний улмаас алдсан “Номин талст” хамтлагийн дуучин Т.Дэлгэрмөрөн фэйсбүүк хуудсаа энэхүү зургаар чимжээ. Ингэхдээ “Сайхан ах дүүс минь ээ. Наадмын өглөө гэргий минь энэ зургийг авч надад урмын үг хэлж билээ. Бид гурав далбаагаа нөмрөөд цэнгэлдэхээ тойрч байлаа. Хүн хүний дотор байгаа юм шиг бүгдийг мэдэхгүй л дээ. Би энэ мөчийг дурсан өөрийн нүүр хуудсаа чимсэн нь энэ. Сайхан нүдтэй хүн сайхныг л харна. Тиймээс элдвийг бүү  бодож сэтгэлээ чилээгээрэй. Мөн хөөрхөн охиноо амьдралд буцааж тавилаа. Ангийн найзууд нь хүндхэн үгээр угталгүй хайрлан тосч авлаа. Ангийн багш хүндэт эцэг эхчүүддээ баярлалаа. Хүн гэдэг бага балчраасаа ийм зүйлийг үзэх ёсгүй ээ. Амьдралд зөндөө л асуудал байна. Гэвч яалтай билээ дээ” гэжээ. Түүний уй гашууг рок попын дуучид, фэнүүд нь гээд олон хүн хуваалцсан бол “Мартагдашгүй” тоглолтод нэгдсэн хамтлагууд тоглолтын орлогын тал хувийг түүний охин Зөөлөнсийд өгч 18 жилийн хугацаатай хадгаламж нээж өгсөн билээ.
Ямартай ч тэрээр өчигдөр тохиосон шинийн наймны өдөр хайртай бүхнийгээ үгүйлэн санаж байгаа хэн бүхэнд эрч хүч бэлэглэж, хамтдаа зовлон бүхнийг сөрж, жаргал бүхнээ хуваалцаж хэн нэгэнд нэмэр болдоггүй юм аа гэхэд гай тарихгүй байх сэтгэлийн чандыг эзэмдэж, сайхан үгээр ерөөл өргөцгөөе гэсэн юм.