Эсгий туургатны хувцасны фестиваль энэ сарын 23-нд буюу маргааш СТӨ-нд болно. Тус фестивалийг БСШУЯ, Дэлхийн монгол туургатны хувцасны холбоо, Монгол Костюмс төв хамтран зохион байгуулж байгаа бөгөөд Дэлхийн эсгий туургатны үндэсний хувцасны соёл, түүний хөгжил, түгээн дэлгэрүүлэлтийг олон нийтэд таниулах, олон улсын хувцас, соёл судлаачид өөрийн туршлагыг солилцох, цаашид хамтран ажиллах, хамтарсан судалгаа хийх хөрсийг бүрдүүлэх зорилготой аж. Эсгий туургатны фестивальд Монголоос Урлах эрдэм загварын товчоо уран сэтгэмжийн 20 иод хувцас, Монгол костюмс монгол хувцасны түүхэн хөгжлийг харуулсан 40 өөд түүхэн хувцас, ӨМӨЗО, Буриад, Тува, Якут, Кыргизстан, Башкирстан, Туркменстан, ОХУ-ын Эрхүү муж, Санкт Питербург зэрэг эсгий туургатан орнууд 60 гаруй хувцас оролцох юм байна.
Дашрамд сонирхуулахад, Фестивалийг нээж АНУ-ын нэрт хөгжмийн зохиолч Charles T. Griffes-ийн “Хувилай хааны цэнгэлийн ордон” симфони найраглалыг Монгол улсад анх удаа эгшиглүүлэх юм байна. Тус бүтээлд Хубилай хааны ордоны дотоод байдлыг хөгжмийн хэллэг, өгүүлэмж, зохирол, дуурьсал, хэм хэмнэл, хөг тогтолцоогоор мэргэжлийн өндөр түвшинд гаргаж харуулжээ. Мөн СУИС-ийн ХУС-ийн профессорын баг, Эгшиглэн манлай хөгжмийн үйлдвэртэй хамтран Монгол хаадын ордоны 7, 9, 11 чавхдаст ятгыг сэргээж сургалт, судалгаа, уран бүтээлийн эргэлтэд оруулж Төрийн шагналт хөгжмийн зохиолч С.Соронзонболдын “Намираа бороо-Хун-Хайр” хааны ордоны ятгын гурвал эгшиглэх аж.
