Мэргэжлийн хяналтын газраас хоёрдугаар сард “Үдийн цай” хөтөлбөрийн хэрэгжилтэд хийсэн шалгалтынхаа дүнг танилцууллаа. Сургууль цэцэрлэгийн амралт эхэлсэн хойно тавьсан тайланд дурдсанаар багагүй зөрчил илэрчээ. Тухайлбал,  сургуулийн цайны газрын тоног төхөөрөмжийн цэвэрлэгээ, халдваргүйтгэлийн чанарыг шалгах зорилгоор нян судлалын 1698 арчдас авч шинжилсэний 22.1 хувь, уснаас авсан дээжийн найман хувь нь нянгийн бохирдолтой хэмээн гарчээ. Мөн лабораторийн шинжилгээгээр үдийн цай хөтөлбөрт  “Гум” компаниас нийлүүлсэн “Био”, “Бифидо”, “Жимстэй” нэрийн тарагны исгэлэн нь стандартын шаардлагад нийцэхгүй байжээ. Мэргэжилтнүүд  
газар дээр нь 284 зөрчил  илрүүлсний 25 хувь нь барилга байгууламж, гадна орчин, 26.4 хувь нь ажиллагсдын ариун цэвэр, 11.6 хувь нь угаалга, цэвэрлэгээ, халдваргүйтгэл, 22.2 хувь нь бүтээгдэхүүний аюулгүй байдал, 14.8 хувь нь бүтээгдэхүүний хадгалалт борлуулалттай холбоотой байжээ.