Америкийн Техас мужийн зүүн хойд нутгаар болсон хар салхинд 26-гаас доошгүй хүн нэрвэгдэж, хэд хэдэн байшин бүрэн нурлаа хэмээн Ван-Занда  тойргийн Онцгой байдлын удирдах газрын төлөөлөгч Чака Эллен мэдэгдсэнийг Associated Press агентлаг дамжууллаа. Тавдугаар сарын 10-ны өглөөгүүр эхэлсэн салхи Даллас хотоос зүүн өмнө зүгт 112 км-ийн зайд  байдаг Ван хотыг дайрч сүйтгэжээ. Эндээс салхины хүч улам ширүүсч торнадо болсон байна.
“Ван хотын барилга байшингийн 30 хувь нь эвдэрч нуран, модод үндсээрээ булгарч, цахилгаан дамжуулах шугамд гэмтэл гарсан” гэж Эллен хэлжээ. Техасын аврах анги газар дээр нь очиж нурангид дарагдсан хүн байгаа эсэхийг шалгаж, эрж байгаа юм байна.