Балбад болсон хүчтэй газар хөдлөлийн гамшиг нийт найман сая хүн нэрвэгдээд байгаагийн 1,4 саяд нь хүнсний нэн яаралтай тусламж хэрэгтэй байна гэж НҮБ мэдэгдлээ.
Олон улсын байгууллага, улс орнуудаас хүмүүнлэгийн  тусламж очсоор байгаа ч өнөө хэр эмнэлгийн тоног төхөөрөмж, хүнс хоол, талийгаачдыг хийх уут хүрэлцэхгүй байна. Нас барсан хүний тоо 4310 хүрлээ гэж Засгийн газар мэдээллээ.
Өнгөрсөн бямба гарагт тус улсад 7,8 магнитудын хүчтэй газар хөдөлж нийслэл Катмандуд олон барилга байшин нурсан бол хөдөө нутагт илүү их нэрвэгджээ.
Бэртэж гэмтсэн хүний тоо 8000 хүрлээ гэж Балбын Дотоод хэргийн яам мэдээлж байна. Балба болон хөрш орнуудад өнөө хэр газар доорхи түлхэлт үргэлжилсээр байна. Нийслэл Катмандуд хүмүүс гурав дахь хоногтоо гэртээ орохоос эмээн гадаа хонож байна.
Цэвэр ус, хүнс дутагдаж, цахилгаан эрчим хүчгүй байгаагаас халдварт өвчин дэлгэрэх вий гэсэн айдас дагуулж байна.
Балбад сүүлийн 81 жил  тохиогоогүй энэ гамшгийн улмаас Эверест ууланд хөрс гулган 18 уулчин амь алджээ. Үүний зэрэгцээ 200 хүн өндөр ууланд гадаад ертөнцөөс тусгаарлагдаад байгаа юм. Даваа гарагт тэднээс зөвхөн 60 хүнийг л нисдэг тэргээр аварчээ.
Балбын засгийн газар гадаад орнуудаас дулаан хөнжлөөс аваад нисдэг тэрэг, эмч, жолооч ирүүлэхийг хүссэн байна.
“Гадаад орнуудаас бид хүмүүнлэгийн тусламж, эмч нарын баг, нэн шаардлагатай эм хэрэгсэл хүсч байна. Энэ гамшгийн үнэлгээ өгөх мэргэжлийн шинжээчид ч хэрэгтэй байна” гэж Балбын хүнд сурталтай тэмцэх албаны тэргүүн Лила Манит Паудель мэдэгджээ.