Балбад дөрөвдүгээр сарын 25-ын өглөөгүүр газар магнитудын 7,9 баллын хүчтэй хөдөлж 1547 хүний амь нас сүйдлээ хэмээн тус улсын Сангийн сайд Рама Шарана Махата мэдэгдсэнийг РИА Новости агентлаг дамжууллаа.

Reuters  агентлаг болохоор 1130 хүн амь үргэдсэн гэж мэдээлж байна. Ийм хүчтэй газар хөдлөл  тус улсад сүүлийн 80 жилд тохиож байгаагүй юм байна. Олон тооны барилга байшин нурж сүйдэн нийслэл Катмандугийн нисэх буудал хаагдаж, тээврийн харилцаа холбоо саатжээ.

Газар хөдлөлийн чичирхийлэл хөрш Энэтхэг, Баншладеш, Төвдэд мэдэгдсэн байна. Энэтхэгт гэхэд л үүний уршгаар 20 хүн нас барсан бол Төвдөд 12 хүн нас барсан мэдээлэл байна.

Газар хөдлөлийн уршгаар Эверестээс хөрс гулгаж уулын бэлд байдаг уулчдын лагерыг дарснаас найман хүн нас баржээ.

Нийслэл Катманду дахь дурсгалт газар сүм хийд газар хөдлөлд олноороо нэрвэгдсэнээс 183 жилийн өмнө барьсан Дхарахарагийн алсыг хардаг цамхаг нурсан байна.

Цамхаг бусад барилга байгууламжийн нуранги дор хэдэн зуун хүн, гадаадын иргэд ч байгаа гэж нүдээр үзсэн хүмүүс хэлж байна. Дүрс бичлэгийн камерийн бичлэгээс үзэхэд европ төрхтэй хүн олон байжээ.