Өвөр байгальд гарсан түймрийн улмаас орон сууцны 203, зуслангийн 284 байшин өртөж шатаад байна гэж хязгаарын амбан захирагч Константин Ильковский ОХУ-ын Онцгой байдлын яамны гал түймрийн хяналтын улсын ахлах байцаагч Борис Борзовт танилцуулсан байна. Энэ барилгууд тус хязгаарын 12 районы 18 суурин газарт байжээ.

Дөрөвдүгээр сарын 13-наас Өвөр Байгалийн хязгаарт хүчтэй салхилж ойн түймэр дэгдэн хоёрхон хоногийн дотор 57 мянган га талбайг хамраад одоо хятадын Өвөр монголын өөртөө засах орны нутагт ороод байгаа юм.
Түймрийн улмаас хоёр хүн амь үрэгдэж,20 гаруй хүн эмнэлгийн тусламж авчээ. Түймэрт  85 байгууламж, иргэдийн 50 гаруй авто машин шатжээ. Түймрийн улмаас учирсан хохирлыг одоогоор 3,2 сая доллар боллоо гэж тооцож байна. Түймэр унтраахаар 660 нэгж ажиллаж байна.