Манай үеийн хамгийн сод эрдэмтдийн нэг Стефен Хаукингийн тухай “Бүхний онол” хэмээх кино өчигдөр Их Британид нээлтээ хийжээ. Энэ киноны гол дүрд жүжигчин Эдди Редмэйн тун чадварлаг тоглосон хэмээн кино урлагийн мэргэжилтнүүд үнэлж буй бөгөөд ирэх оны Оскараас юм дуулгана хэмээн итгэж байна.
Киноны нээлтийн ёслолд их эрдэмтэн анхны эхнэртэйгээ хүрэлцэн иржээ. Уг киноны зохиолыг түүний анхны эхнэр Жэйн Хаукингийн бичсэн “Стефентэй өнгөрүүлсэн миний амьдрал” хэмээх дурсамжаас сэдэвлэн бичжээ. Кинонд Стефен болон түүний эхнэрийн Кэмбрижэд оюутан байх үеэс эхлээд хүнд өвчин туссан, эрдэм шинжилгээний алдартай нээлтээ хийсэн гээд олны сонирхлыг татах бүх л үеийг нь хамарсан байна. Жүжигчин Эдди Редмэйн хүнд өвчтэй эрдэмтний дүр төрхийг бүрэн гаргахын тулд яг л бүжигчин хүн шиг хэдэн сарын турш дасгал сургуулилт хийсэн гэнэ.