Гадаад хэргийн яамны залуу албан хаагчдын санаачилгаар “Залуу дипломатчдын клуб”-ийн үйл ажиллагаа сэргэж, шинэ зохион байгуулалтад оржээ. Тус клуб өнгөрсөн аравдугаар сарын 31-ний өдөр болсон бүх гишүүдийн анхны хурлаараа дүрмээ хэлэлцэж, бүтэц зохион байгуулалтын хувьд байнгын ажиллагаатай 11 гишүүн бүхий Зохицуулах зөвлөл, клубийн тэргүүн, дэд тэргүүнтэй байхаар баталж, нийт 84 гишүүнтэйгээр үйл ажиллагаагаа явуулж эхлээд байна. Өнгөрсөн сарын сүүлчээр “Залуу дипломатчдын клуб”-ын албан ёсны нээлтийн ёслолын ажиллагаа болж, “Around the world” хэлэлцүүлэг, “Өглөөний мэнд” мэдээллийн цаг зэрэг арга хэмжээ болсон байна.
Дипломат албанд өндөр чадвартай залуу боловсон хүчнийг төлөвшүүлэн хөгжүүлэх, өмнөх үеийн залгамж чанарыг хадгалах, залуу ажилтнуудын нийгмийн идэвхийг нэмэгдүүлэх, Улаанбаатар дахь дипломат корпустай идэвхтэй харилцах, хамтдаа хөгжих нөхцөлийг бүрдүүлэх нь тус клубийн зорилго аж.