Монголын Залуучуудын Холбоо энэ сарын 1-нээс эхлэн шагналын журмаа өөрчилжээ. Шинэ журмын дагуу МЗХ-ны тэмдэг, медалиар шагнуулсан тэргүүний залууст тодорхойлсон байгууллага нь үндсэн цалинтай дүйцэхүйц мөнгөн шагнал урамшуулал олгох ёстой болж байгаа аж. Түүнчлэн шагналын материалыг хүлээж авснаас хойш хурдан хугацаанд шийдвэрлэж өгөх үүднээс онлайнаар бүртгэж эхэлсэн байна. Энэ нь нэгдүгээрт цаг хугацаа хэмнэхээс гадна тухайн хүн ямар ололт амжилтаараа шагнуулж байгааг олон нийтэд нээлттэй, ил тод болгож байгаа юм.
МЗХ өмнө нь “Залуу үеийг халамжлан хүмүүжүүлэгч”, “Тэргүүний залуу”, “Тэргүүний хилчин”, “Хөдөлмөрийн алдар”, “Тэргүүний малчин залуу”, “Тэргүүний тариаланч залуу”, “Тэргүүний сурагч”, “Цэргийн алдар” гэсэн найман төрлийн шагнал олгодог байсан бол энэ жилээс салбар тус бүрээр нь залуусыг тодруулдаг болж байгаа гэнэ. Тухайлбал,  “Төрийн залуу түшээ”, Тэргүүний залуу хуульч, инженер, сэтгүүлч, бизнесмэн цол тэмдэг болон “Эр зоригийн, уурхайчны, тамирчны алдар, “Залуу зохион бүтээгч”, “Тэргүүний хилчин” хэмээх цол тэмдгийг тус тус гаргажээ. Үүнээс гадна улсын хөгжилд онцгой хувь нэмэр оруулсан 45-аас дээш насны олонд танигдсан, МЗХ-ны төсөл, хөтөлбөр, үйл ажиллагаанд идэвх чармайлттай оролцсон хүнийг жилд нэг удаа “Үндэсний удирдагч” “Шилдэг удирдагч” медалиар шагнах юм байна.