Өнөөдөр зуны тэргүүн сарын шинийн 15,  бурхан багшийн их дүйчин өдөр. Энэ өдөр бурхан багш эхийн хэвлийгээс мэндэлсэн, гэгээрлийн хутгийг олсон, нирваан дүрийг үзүүлсэн нь давхацдаг учраас 250 гаруй жилийн тэртээгээс буддын шашинт орнууд Бурхан багшийн их дүйчин өдөр хэмээн тэмдэглэж иржээ.
Бурхан багш нирваан дүрийг олохдоо лагшин нь эрдэнийн үрэл болон цацагдаж тэр үрэл нь номын хүчээр байнга арвижсаар байсан тул буддын шашинтнууд сүсэглэж эхэлсэн учиртай гэнэ. “Дүй” буюу “цаг, “чин” буюу их гэсэн утгатай хоёр үгийг хамтатган нэрлэсэн энэ өдрийг олон улс даяар баяр болгон тэмдэглэж байх тогтоолыг НҮБ гаргаснаар энэ жил илүү өргөн тэмдэглэж байгаа юм.

Өнөөдөр монголын бурхан шашинтны төв Гандантэгчилэнлэн хийдэд ринсэл залах, маань хөгжөөх, Манал бурхны лүн залах зэрэг шашны томоохон ёслол болж хурал хурах юм. Мөн Гандан хийдээс  Чингисийн талбай хүртэл “Эв нэгдэл, энэрэнгүй сэтгэл” жагсаал болно.
“Их дүйчин өдөр сүсэгтэн олон нүглийг тэвчиж, буян хурааж, итгэж биширч чадвал бурхан багштай сэтгэлээрээ, сүжгээрээ уулзаж байгаа нь тэр хэмээн Монголын бурхан шашинтны шинэ төвийн этргүүн, монголын Их хүрээ хийдийн хамба З.Санждорж хэлж байна. Түүний хэлснээр энэ өдөр лам хуваргуудаас гадна энгийн хүмүүс ч нэг өдрийн сахил авч болдог байна. Энэ нь  архи уухгүй, тамхи татахгүй, хүүхдээ загнахгүй гэх мэт өөрийн чадах үйлдлээрээ андгай тавьж өөрийгөө ариусгана гэсэн үг гэнэ. Ийнхүү нэг өдөр ч гэсэн муу муухайгаас хол байснаараа амар тайван, сайн сайхан гэж юу болохыг бага ч гэсэн ойлгож цаашдаа эдгээр муу зуршлаа багасгахад нөлөөлдөг байна.
Энэ өдөр хийсэн буян хэдэн арван түмээр арвиждаг болохоор амьтай бүхнийг хайрлан хамгаалж, цагаан хоол идэхээс эхлээд 10 хар нүглийг тэвчиж буян хураацгаая.