Өнгөрсөн долоо хоногт Улаанбаатарт нэгэн гэр бүлийн уулзалт олны нүднээс чимээгүйхэн болж өнгөрчээ. Хойд Солонгосоос ирсэн 26 настай бүсгүй япон өвөө эмээтэйгээ Монголд уулзсан байна. Ким Юн Гён гэх 26 настай энэ бүсгүй Мегуми Ёкота хэмээх япон эмэгтэйн охин ажээ. Мегуми Ёкота бол 1970-1980-аад оны үед Хойд Солонгост хулгайлагдсан олон япон хүний нэг юм.  Түүнийг 1977 онд 13 настай байхад нь Хойд Солонгосын мэргэжилтнүүдэд хулгайлан авч яваад тагнуулчаар бэлтгэж байсан бөгөөд Мегуми нас биед хүрэх үедээ мөн л Өмнөд Солонгосоос хулгайлагдан ирсэн залуутай сууж, Ким Юн Гёныг төрүүлсэн аж.     
Хойд Солонгосын тал Мегуми шиг япон хэлтэй хүүхдүүдийг хулгайлан авч яваад тагнуул туршуулаар бэлтгэж байсан нь хоёр улсын хооронд нэг хэсэг маш том маргаан дэгдээсэн юм. Тэд арваад хүүхэд авч явснаас дийлэнх нь нас барсан хэмээн мэдэгдсэн байдаг. Мегумиг ч бас 1994 онд амиа хорлож нас барсан гэдэг боловч Японы тал үүнд итгэдэггүй юм. Учир нь, Мегумигийн шарил хэмээн хүлээлгэн өгсөн цогцост ДНК-ийн шинжилгээ хийж үзэхэд биш болох нь тогтоогдож байжээ.

Гэвч Мегумигийн охин Ким Юн Гён ээж нь нас барсан нь үнэн гэдгийг амьдралдаа анх удаа уулзсан япон эмээ, өвөөдөө хэлсэн байна. Харин о9хинд хийсэн шинжилгээгээр Ёкотагийн гэр бүлийн хүн мөн болох нь батлагджээ.
Япон, Хойд Солонгос улсууд хоорондоо дипломат харилцаа тогтоогоогүй, Улаан загалмайн байгууллагаар дамжуулан харилцдаг учир энэ ховорхон уулзалтад Монголын тал зуучлагчийн үүрэгтэйгээр оролцсон байна. Гэхдээ энэ уулзалтын дүнд хоёр улсын харилцаа сайжрах эсэх нь одоогоор тодорхойгүй байгаа юм.
13 настай байхад нь хамгийн сүүлд харсан охин нь үгүй болсон ч Хойд Солонгост амьдарч буй түүний үр үндэстэй уулзаж, элгээ дэвтээсэн япон гэр бүл уулзалтынхаа талаар хэвлэлд ярихаас татгалзжээ.