Цаг уур орчны шинжилгээний газрын мэдээллээр 11-нд нутгийн хойд хэсгээр, 12-нд зарим газраар, 13-нд нутгийн зүүн хэсгээр, 14-нд баруун зүгийн нутгаар бага зэргийн цас орж, зөөлөн цасан шуурга шуурна гэлээ. Салхи 13-14-нд Алтайн уулс, говь талын нутгаар секундэд 12-14 метр хүрч ширүүснэ. Их нууруудын болон Дархадын хотгор, Хүрэн бэлчир, Идэр, Тэс, Ерөө голын сав газраар шөнөдөө 35-40 градус, өдөртөө 21-26 градус, Сэлэнгэ, Хараа, Туул, Тэрэлж, Хэрлэн, Онон, Улз, Халх голын сав газраар шөнөдөө 28-33 градус, өдөртөө 16-21 градус хүйтэн байх юм байна.
Түүнчлэн зарим томоохон гол, мөрний газар доорх усны хажуугийн цутгал урсацаас шалтгаалан халиа, өрх үүсэх, голын дагууд харз, тошин гүйх, нуурт өрх үүсч, мөс нимгэрэх зэрэг үзэгдэл ажиглагдаж эхэлжээ. Тиймээс нуурын толио, гол мөрний нийт уртын дагууд мөсний зузаан харилцан адилгүй байгаа тул ард иргэдийг гарам бус газраар авто тээвэр хийхээс татгалзаж, мөс цөмрөх аюулаас болгоомжлохыг анхаарууллаа.  Учир нь, 2013 оны мөн үеийнхээс мөсний зузаан 10-50 см нимгэн байгаа аж.