Өмнөд Солонгосын үндэстэн дамнасан “Samsung” группт ажилд орох сонирхолтой хүмүүсийн тоо жил ирэх тусам өссөөр байна. Энэ онд гэхэд 100 мянган залуу тус группт ажилд орохоор өргөдлөө өгсөн байна. Тэд нээлттэй зарласан 5000 ажлын байрны төлөө шалгалт өгч, өрсөлджээ. Энэ нь нэг ажлын байран дээр дунджаар 20 хүн өрсөлдөнө гэсэн үг юм. Өмнөд Солонгост жилд дунджаар 300 гаруй мянган оюутан их сургууль төгсдөг бөгөөд энэ онд 100 мянган залуу ажилд орох өргөдөл өгсөн гэхээр шинээр ажлын талбарт гарч байгаа гурван хүн тутмын нэг нь “Samsung”-д ажилд орох сонирхолтой болж таарч байна.
Samsung групп жил бүр нээлттэй ажлын байруудаа зарлаж, ажилтан шалгаруулж авдаг бөгөөд 2013 оны шалгалт өнгөрсөн аравдугаар сард болоход энэ олон мянган залуусаас шалгалт авахын тулд тус компанийн 9000 гаруй ажилтан ажилласан гэнэ.
